Theo W. Jandrell (*19 Augustus 1888 - 1968) was ’n Afrikaanse onderwyser en inspekteur van skole, wat ’n groot bydrae maak met die kinderversies en liedjies wat hy geskryf het. Talle van sy liedjies is in die FAK-sangbundel opgeneem en is baie bekend.
In 1909 lê hy die Onderwyserseksamen O3 van die Kaapprovinsie met sukses af en studeer daarna verder aan die Victoria Kollege op Stellenbosch. Vanaf 1912 tot 1913 gee hy onderwys op Richmond en vanaf Julie 1914 tot 1920 in die distrik Wakkerstroom in die Transvaal, waar hy prinsipaal is van Driepoort en Sandspruit, twee klein skooltjies. Hier neem hy leiding met die invoer van Afrikaans as onderrigtaal, maar omdat daar nie genoeg kindergedigte vir opvoeding was nie, skryf hy self ’n groot aantal gediggies. In 1921 word hy hoof van die Laerskool Pionier op Volksrust, ’n betrekking wat hy beklee totdat hy in 1940 aangestel word as Inspekteur van Onderwys in Pretoria. Hierna is hy inspekteur vir Waterberg en daarna Wolmaransstad en omgewing, waarna hy aan die begin van 1945 na die Oos-Randse Inspeksiekring verplaas word met hoofkwartiere op Boksburg.
Hy publiseer sy kindergedigte in die bundels Die ou murasie en ander gediggies (vir die hoër klasse van die laerskool) en Moeder en kind en ander gediggies (vir die junior klasse van die laerskool). Van sy kinderverse word opgeneem in die versamelbundels Nuwe Kleuterverseboek en My Afrikaanse verseboek en Pirow Bekker neem daarvan ook op in Digters op die toring. Later versoek mnr. Alers hom om behulpsaam te wees met die saamstel van leesboekies in die Jong Suid-Afrika reeks.