Wat Jane vergeet het

(Vind die Audio Weergawe onderaan die blad)

"Jane, hou op om vir arme Eric te terg," het Mammie deur die kombuisvenster geroep.

"Ek terg hom nie, hy is sommer vir niks kwaad nie," het Jane teruggeroep.

"Jy het hom kwaadgemaak, jy terg hom gedurig. Jy het hom nou al twee keer vanmôre uit die kruiwa laat val."

"Hy hou daarvan," het Jane geantwoord.

"Ek glo dit nie. Hoe sal jy daarvan hou om op die harde grond omgekeer te word, Jane?"

"Ek dink ek sal nogal daarvan hou," het Jane met 'n ondeunde glinstering in haar oë gesê.

"Wel, probeer tog soet wees en moet hom tog nie so terg nie," het Mammie mismoedig bygevoeg.

'n Paar minute lank waas daar min of meer stilte. Die twee het gelukkig en soet saamgespeel. Maar toe was daar weer moeilikheid.

"Boe-hoe-hoe!" het Eric gehuil en Mammie het weer deur die kombuisvenster gekyk om te sien wat aangaan.

"Wat is die moeilikheid nou weer?" het Mammie gevra.

"Jane het sand op my kop gegooi!" het Eric huilend geskree.

"Ek het sommer met hom gespeel. Hy het daarvan gehou," het Jane teruggeskree.

"Dit klink nie so nie. Jane, jy moet my nou mooi verstaan: ek gee jou nog één kans. As ek weer 'n gehuil hoor, kom  jy dadelik huis toe, gehoor?"

Weer was daar stilte....maar nie vir lank nie.

Mammie het net begin dink dat haar waarskuwing gehelp het, toe sy weer daardie bekende geluid hoor - hierdie keer net harder as ooit te vore.

"Boe-hoe-hoe-hoe!"

Sy hardloop weer om uit te kyk - en wat sou sy sien? Daar was Jane besig om die arme Eric met 'n gieter nat te gooi asof hy 'n blom is.

"Jane, wat op áárde doen jy? Hou dadelik op!" het Mammie geskree.

"O,  hy hou daarvan. Hy sê hy kry so warm. Hy hou regtig daarvan," het Jane geroep.

"Wag net tot ek daar kom," het Mammie geskree.

Jane het besef dat dit tyd is om te vlug en sy het so vinnig as haar beentjjies haar kon dra, begin hardloop. Maar Mammie was te gou vir haar en sy het haar gevang en teruggebring.

"O jy dink hy hou daarvan," het Mammie uitasem gesê. "Is dit so Eric?" het Mammie uitasem gesê.

"Nee, Mamma, ek hou nie daarvan nie!" het Eric geskree.

"Ek is seker hy hou daarvan," het Jane gehyg.

"Dan sal ons sien," het Mammie gesê, want skielik het sy 'n plan gekry. "Waar is die gieter?"

Met die een hand het sy Jane styf vasgehou en met die ander het sy die gieter op haar omgekeer.

"Mammie, Mamma, hou op, hou op!" het Jane geskree.

"Maar ek is seker jy hou daarvan. Ek kan sien jy geniet dit terdeë," het Mammie gesê.

"Ja, ek kan sien sy hou daarvan Mamma," het Eric laggend uitgeroep.

"Nee, hou op, asseblief, hou op!" het Jane huilend gesê.

"Nou glo ek dat hierdie bietjie water baie goeie saad in jou hart gaan laat groei, Jane," het Mammie laggend gesê.

"Dit sal nie," het Jane brom-brom gesê.

"Ek dink dit sal, want jy vergeet altyd die goue reël wat lui: 'Doen aan andere soos jy wil hê dat hulle aan jou moet doen' en van vandag af sal jy dit nooit weer vergeet nie."

Jane het niks gesê nie en huis toe gestap om droë klere te gaan aantrek. Sy het baie nors gelyk, maar sy het tog onthou en van toe af was daar meer vrede as ooit tevore in en om die huis.

(Die les hieruit: mense wat ander terg, hou gewoonlik nie daarvan om self geterg te word nie....maar soms is "eie medisyne" 'n goeie les!)


Slaaptyd stories
Deel DRIE

deur Arthur S. Maxwell

"A 

Om die dam Perderoete