Slaaptyd stories deur Arthur S. Maxwell
Tommie se Trompet
Waarom mense vir seuntjies trompette moet gee as verjaarsdaggeskenke weet ek nie; maar hulle doen dit tog, en dit is daarom dat Tommie eendag die trotse besitter geword het van een van daardie lawaaierige 'musiekinstrumente.'
En Tommie was vreeslik in sy skik daarmee. Hy het daarop geblaas en geblaas en geblaas totdat almal in die huis net moeilik was. Eindelik is Pappie se stem daar uit die studeerkamer gehoor, en dit het glad nie te vriendelik geklink nie: "Tommie, ek kan daardie geraas nie langer uithou nie! Hou asseblief op om daardie trompet te blaas!"
"Maar Pappie, dis dan my verjaarsdag."
"Ek weet dit," het Pappie gesê, "en dit is die rede waarom ek nie eerder gepraat het nie; maar wat te erg is, is darem te erg."
"Wel, kan ek dit net 'n bietjie langer blaas?"
"Goed, maar net vir 'n klein rukkie langer, hoor!"
Tommie het toe weer begin blaas, maar hierdie keer het hy dit buite in die tuin gaan doen. Hy het egter vergeet dat hy die trompet net vir 'n rukkie langer kon blaas. Weer het hy tot vervelens toe geblaas, en Pappie was verplig om die venster op te skuif, uit te leuen en te sê: "Tommie, hou dadelik op met daardie lawaai!"
"Maar dis mos my verjaarsdag," het Tommie gesê.
"Ek weet dis jou verjaarsdag," het Pappie gesê, "maar dit gee jou nie die reg om almal vir myle in die omtrek te irriteer nie."
"Wel, mag ek dit dan aan die anderkant van die huis gaan blaas?"
"Ja, maar sorg dat jy dit nie te hard blaas nie."
"Goed, Pappie."
Maar dit het tog nie gehelp nie, want die geblêr van daardie trompet was so deurdringend dat dit dwarsdeur die huis gegaan het, en boonop was daar nog die eggo's van die ander huise in die omtrek.