Slaaptyd stories deur Arthur S. Maxwell
In Klip Verander
"Gaan jy nie vanaand bid nie?", het Moeder gevra toe Dick ewe vies in die bed klim. "Nee, ek gaan nie bid nie," het Dick kortaf gesê. "Dick," het Moeder verstom uitgeroep. "Ek verbaas my oor jou. Wat is met jou verkeerd in die laaste tyd?. Jy het dan altyd so gereeld gebid."
"Die ander seuns by die skool bid nie, " het Dick geantwoord. "Hulle sê dat dit sommer pure onsin is."
"Dis waarvoor ek bang was," het Moeder gesê. "Daardie seuns met wie jy deesdae maats maak, lei jou na die verderf. Waarom laat jy hulle jou beïnvloed? Hulle doof al die liefde uit wat jy eenmaal vir Jesus gehad het, en hulle verander jou hart in 'n klip. Het jy al ooit iets gesien wat versteen is?"
"Nee."
"Wel, ek het. By Matlock Bath in Darbyshire, is daar 'n merkwaardige fontein wat goed binne 'n jaar in klip verander. 'n Vernuftige man wat daar woon, het 'n tenk by die fontein opgerig, en vir baie jare al plaas hy allerande soort goed daarin vir die water om op te werk. Voëlneste, eiers, sponse, wandelstokke, skoene, en selfs 'n ou hoed word met 'n kors van kalk bedek, sodat die goed lyk of hulle van klip is. Maar daar is iets anders wat 'n mens tref by daardie fontein. Rondom die tenk groei varings, gras, en ander struike, dog die water kan hulle nie in klip verander nie, alhoewel dieselfde water oor hulel vloei. En weet jy waarom nie?"
"Nee, ek weet nie," het Dick geantwoord.