In die weegskaal geweeg

(VIND DIE AUDIO WEERGAWE ONDERAAN DIE BLAD)

Oom Attie se Slaaptyd stories

Deel Twee

deur Arthur S. Maxwell

Ge 
Van al die wonderlike dinge wat daar in Londen te sien is, is daar seker niks wonderliker as die skaal by die koninklike munt nie.

Daar is een skaal wat so fyn gebalanseer is dat as jy twee stukkies papier van gelyke grootte neem en jou naam op een stukkie skryf, dan sal die een met jou naamtekening swaarder weeg as die een daarsonder, dit sal aantoon hoe swaar jou naam weeg!

Dit is baie belangrik dat die skaal sekuur moet weeg, want die hele geldstelsel van die land is daarvan afhanklik.

Julle moet verstaan dat banke nie hulle geld tel nie, hulle weeg dit. Elke muntstuk moet die regte gewig hê anders is daar gevaar dat hulle aan sommige mense meer geld sal uitbetaal as wat hulle moet kry en dit sal baie gou moeilikheid veroorsaak.

Maar daar is nog 'n ander rede waarom  hierdie skale perfek moet wees. In die proses van die aanmunting van geld, soos die smelt van die m etaal en ander werksaamhede voordat dit tot munt geslaan word, is daar gevaar dat sommige daarvan verlore kan raak; hierteen moet gewaak word en daarom word sulke akkurate skale gebruik. As daar nie sulke waaksaamheid was nie, kan daar miskien snaakse dinge gebeur.

Wat gedoen word, is dit: die metaal word van kamer tot kamer ingeweeg en uitgeweeg met die baie fyn skale en as daar 'n verskil is, dan moet die betrokke beamptes rekenskap gee, want selfs die kleinste verskil beteken baie wanneer goud of silwer geweeg word.

Dit is wanneer die proses van muntslaan so te sê klaar is, dat die skale soms verbasende dinge aantoon.

Die skale skei munt in drie klasse, naamlik "regte gewig", "te lig" en "te swaar". Dit is baie interessant om te sien hoe skale werk en die muntstukke verdeel in die klasse waaraan hule behoort.

'n Mens kan die skale nie bedrieg nie. As 'n geldstuk net 'n duisendste deel van 'n ons te lig is, sal die skaal dit aanwys. As een net effentjies te swaar is, toon die skaal presies aan hoeveel dit te swaar is. Elke geldstuk moet net reg wees.

Toe ek eendag hierdie proses gadeslaan, kon ek nie help om te dink aan die les wat die werkers in die munt gedurig geleer word nie - alhoewel ek glo dat hulle soms te besig is om daaroor na te dink. In elke kamer waar hulle werk, word hulle gedurig daaraan dat hulle werk dopgehou en nagegaan word tot 'n duisendste deel van 'n ons.

As al die werk wat julle op skool doen, of wanneer julle vir Pa in die tuin of Ma in die kombuis help, so ondersoek moes word, dan wonder ek wat die resultate sou wees?  Hoeveel sal moet afgekeur word as onvolmaak. Seker baie meer as wat ons graag sou wil erken, of selfs verwag het.

Maar daar is nog iets waaraan hierdie weegskale my laat dink. Onthou julle die teks wat sê "Elke ydel woord wat die mense praat, daar moet hulle rekenskap van gee in die oordeelsdag"? Matt. 12:36

Dit kom hierop neer dat al sou ons nie ons eie woorde weeg nie, is daar Iemand wat dit wel doen. Die hemelse weegskaal, baie fyn gestel, baie fyner as die van die munt, sal getrou die gewig aantoon van elke woord wat ons gepraat het. En ek is bevrees dat sommige van die woorde wat ons praat, nie baie swaar weeg in die oë van God nie. Die gedagte hieraan behoort ons baie versigtig te maak in al ons woorde en dade!

In die boek Daniël is daar 'n verhaal van 'n koning wat oneerbiedig was teenoor God en wat gespog het met sy eie dade. Skielik, terwyl hy besig was met 'n groot feesmaal, is daar teen die paleismuur 'n man se hand gesien wat iets daar geskryf het.

Weet julle wat hy daar geskryf het?  "U is op die weegskaal geweeg en te lig bevind" (Dan 5:27).

Die engele het geluister na die koning se vermetele woorde. Sy dwase woorde is in die h weegskaal geweeg en heeltemal te lig bevind. Om die waarheid te sê, sy hele lewe was vol hoogmoed en waardeloos, vol verwaarloosde geleenthede om goed te doen. Daarom het die hemelse boodskappers daardie verdoemende vonnis teen die muur geskryf en nog daardie selfde nag is koning Belsasar doodgemaak.

Eendag, niemand weet hoe gou nie, sal onsook in die weegskaal geweeg word. Wat sal dan geopenbaar word?