Dis beter om te sterf

(VIND DIE AUDIO WEERGAWE ONDERAAN DIE BLAD)

Oom Attie se Slaaptyd stories

Deel Twee

deur Arthur S. Maxwell

Daar word 'n baie interessante storie vertel van Eerwaarde CP Golightly, 'n predikant van die Kerk van Engeland wat jare gelede al dood is.

Hy was 'n baie goeie man en 'n vurige prediker, maar sy naam bly bekend omdat hy leuens so gehaat het. Hy kon nie iets verdra wat nie absoluut openlik en waar was nie.

Hy was baie lief vir die kinders en hy het hulle baie toegespreek in die skole in die buurt van Oxford. Wat hy hulle altyd goed op die hart gedruk het, was die belangrikheid om altyd die waarheid te praat.

By elke skool waar hy gegaan het, het hy die kinders die volgende Engelse rympie geleer: "It is better to die, than to tell a lie" - Dis beter om te sterf as om 'n leuen te vertel.

Wanneer hy weer later op 'n dorpie kom waar hy die kinders voorheen toegespreek het, het hy gewoonlik aan sy vriende gesê "Ek sal julle nou wys watter kinders hier my vriende is....luister net".

Dan stap hy na een van die seuns, lê sy hand op hom en sê "Dis beter om te sterf...." en as die seun die sin voltooi en sê "as om 'n leuen te vertel", dan het hy aan sy vriende gesdê "Sien julle nou, dit is een van my kinders."

Deur hierdie eenvoudige toets kon hy altyd sy kinders uitken en die seuns en dogters - wetende dat hulle hom enige tyd onverwags mag ontmoet - het gesorg dat hulle nie vergeet het wat hy hulle geleer het nie.

Maar nou wonder ek: veronderstel dat ek een van julle nou sou teëkom en sal sê wat daardie ou predikant aan sy kinders gesê het, wat sou julle antwoord? As ek sou sê "Dis beter om te sterf...." sou julle die sin sonder om te aarsel kan voltooi deur te sê "as om 'n leuen te vertel"?  Sou julle?

Ek weet julle sal dit kan doen as julle regtig glo wat daardie rympie sê.

In die verlede was daar al manne en vroue wat werklik die dood verkies het, liewer as om 'n leuen te vertel. Hulle het marteling en 'n wrede dood verkies, liewer as om hul lewe te besmet met 'n leuen. Die wêreld het vandag groot behoefte aan meer sulke manne en vroue.

As julle eendag so 'n man of vrou wil wees, dan moet julle Eerwaarde Golightly se woorde onthou: "It is better to die, than to tell a lie".

Niemand sou seker kan sê hoeveel seuns en dogters deur sy woorde bewaar is van leuentaal nie. Soos waarskuwende klokkies het daardie woorde, elke keer wanneer hulle in versoeking gekom het om 'n leuen te vertel, in hul ore gelui en so is hulle van daardie sonde bewaar.